ВМРО-ДПМНЕ: Во СДСМ знаеле дека Груби и Бајрами крадат, ама молчеле за да им трае владината коалиција

„И сега, кога сиот криминал на Груби, посебно во Лотарија, за кој во СДС знаеле, излегува на површина, ги нема да го осудат, да се дистанцираат и да го повикаат да се врати во Македонија и да се соочи со правдата“, велат од владејачката ВМРО-ДПМНЕ

Advertisements

Груби и другар му Перпарим системски краделе од Лотарија, во СДС за тоа знаеле и молчеле за да им трае владината коалиција, обвинија денеска од владејачката ВМРО-ДПМНЕ.

Од партијата тврдат дека поранешниот прв вицепремиер Артан Груби со, како што велат, другар му Перпарим Бајрами, ексдиректорот на Државна лотарија, си направиле криминална шема од која профитирале милиони.

„Артан Груби и Перпарим Бајрами системски краделе од Лотарија и ваквиот криминал од надлежните институции е документиран и истражен. За неколку месеци од преземањето на власта од ВМРО-ДПМНЕ документиран е случајот со Државна лотарија и покренати се истражни постапки и кривични пријави. Криминалот во Лотарија се шири, а Груби и другар му Перпарим злоупотребиле многу повеќе од осум милиони евра. Во Државна лотарија се договарани тендери за набавка на телевизори, печатачи, компјутерска и комуникациска опрема во вредност од над 400 000 илјади евра“,

велат од ВМРО-ДПМНЕ.

Според нив, криминалот во овие тендерски постапки за набавка на телевизори и компјутерска опрема лежи во тоа што, иако е потпишан прием за нив, по спроведените проверки и попис не се пронајдени.

„За ваквиот криминал, кој имал епидемиски размери и по само шест месеци по промената на власта можеше да се документира, истражи и да се процесира, не е можно да не знаеле во СДС. Во СДС сигурно знаеле за ваквиот криминал во Лотарија, но ги оставиле Груби и ДУИ да крадат од македонските институции за што подолго останат на власт и во удобните фотелји. И сега, кога сиот криминал на Груби, посебно во Лотарија, за кој во СДС знаеле, излегува на површина, ги нема да го осудат, дистанцираат и да го повикаат да се врати во Македонија и да се соочи со правдата“,

велат од партијата.