Покрај во Хрватска, за претседател на републиката се гласа и во дијаспората, во 38 земји, девет помалку од пред пет години, а право да го изберат имаат вкупно 3 762 224 гласачи.
Гласачите одлучуваат дали ќе му дадат нов, втор мандат на актуелниот претседател Зоран Милановиќ, кој е поддржан од СДП и нејзините партнери или на еден од неговите противници – Миро Буљ (Мост), независниот Томислав Јоњиќ, Ивана Кекин (Можеме), Бранка Лозо (ДОМИНО), Драган Приморац (ХДЗ и партнери) и независните кандидати Марија Селак Распудиќ и Нико Токиќ Картело.
Државната изборна комисија (ДИК), клучното тело за спроведување на изборите, ги повика гласачите да излезат на гласање и да го остварат своето право.
„Исто така, повикуваме се да се одвива во мир, во демократска атмосфера и гласачите да го искористат своето уставно право“,
вели потпретседателката на ДИК, Весна Фабијанчиќ Крижаниќ.
Во Хрватска гласачите ќе можат да го остварат своето право на повеќе од 6 500 редовни избирачки места и 123 специјални, каде што ќе можат да гласаат затворениците, бродските екипажи и гласачите во институциите за социјална заштита.
На годинешните избори, како и на оние во 2019 година, нема посебни избирачки места во Вооружените сили на Република Хрватска, туку нивните припадници гласаат во нивните места на живеење.
Избирачките места се отворени од 7 до 19 часот до кога трае дводневниот изборен молк во кој е забрането секое изборно рекламирање, објавување проценки на резултатите, како и претходни, неофицијални изборни резултати.
