Бројот на жртвите од разорниот земјотрес во Мјанмар надмина 3 000, а стотици сè уште се водат како исчезнати. Се прогнозира дека несезонските дождови ќе претставуваат нов предизвик за спасувачите и хуманитарните работници.
Земјотресот со јачина од 7,7 степени според Рихтеровата скала што го погоди Мјанмар пред шест дена, еден од најсилните во оваа земја во Југоисточна Азија во изминатиот век, го потресе регионот од 28 милиони луѓе, уривајќи згради, а многумина останаа без храна, вода и засолниште.
Бројот на загинати вчера се искачи на 3 003, со 4 515 повредени и 351 исчезнати, објави амбасадата на Мјанмар во Јапонија на Фејсбук. Условите би можеле да станат потешки бидејќи се предвидува да врне несезонски дожд од недела до 11 април, кој ќе ги загрози областите најтешко погодени од земјотресот, како што се Мандалеј, Сагаинг и главниот град Најпидау.
„Дожд доаѓа, а има уште толку многу затрупани. Особено во Мандалеј, ако почне да врне, луѓето кои се под урнатините ќе се удават дури и ако преживеале до овој момент“, изјави хуманитарец во Мјанмар за Ројтерс.
Досега имало 53 авионски достави на помош за Мјанмар, се додава во соопштението на амбасадата во Јапонија, додека повеќе од 1 900 спасувачи пристигнале од 15 земји, вклучувајќи ги соседите, како и Кина, Индија и Русија.
Спасувачите користат машини и булдожери за да разбијат 100 тони бетон и да ги лоцираат сите преживеани по уривањето на облакодер во кој загинаа 15 лица, додека 72 сè уште се водат како исчезнати. Во Тајланд загинаа вкупно 22 лица.
