Во Софија продолжуваат експертските разговори меѓу Македонија и Бугарија

Во Софија денеска и утре продолжуваат разговорите на експертско ниво меѓу министерствата за надворешни работи на Северна Македонија и на Бугарија посветени на политичкиот пакет прашања за надминување на разликите меѓу двете земји за кои македонскиот премиер Димитар Ковачевски очекува тие да се водат во духот на европските вредности и со почитување на достоинството и на граѓаните и на двете држави.

„Доколку сакате да решите отворено прашање мора да комуницирате. Не може само со обвинувања, како што имавме изминатиот период. Тоа мора да биде комуникација во која може да се видат бенефитите од двете страни и да се врати довербата меѓу нив“, изјави Ковачевски. Според него, постои можност двата процеса – интеграција на Северна Македонија и преговорите да се водат паралелно.