Втор ден од посетата на премиерот Мицкоски на Брисел
Премиерот Христијан Мицкоски, кој од вчера престојува во посета на Брисел, денеска ќе учествува на Самитот на Европската народна партија (ЕПП) на кој главни теми ќе бидат подготовките за денешниот Европскиот совет и проширувањето на ЕУ.
Домаќин на Самитот ќе биде претседателот на ЕПП, Манфред Вебер, а на него покрај Мицкоски ќе учествуваат и другите лидери од партиите членки на Европската народна партија од ЕУ и од Западниот Балкан, како и претседателките на Европската комисија и на Европскиот парламент, Урсула фон дер Лајен и Роберта Мецола.
За време на престојот во Брисел, премиерот Мицкоски е придружуван од министрите за надворешни работи и надворешна трговија Тимчо Муцунски и за европски прашања Орхан Муртезани.
Вчера, на првиот ден од престојот во Брисел, Мицкоски учествуваше на Самитот ЕУ-Западен Балкан, а имаше и билатерални средби со високата претставничка на Унијата за надворешни работи и безбедносна политика Каја Калас и со премиерите на Шпанија и Полска, Педро Санчез и Доналд Туск.
