За барок-куќа на Груевски платени 60.000 евра комуналии, ама градбата не почнала

На падините на Водно бегалецот Никола Груевски требало да изгради луксузна куќа во барок – стил, препознатлив за неговото владеење. Обвинителството за организиран криминал на денешното судење за случајот „Плацеви на Водно“ презентираше каква куќа замислил и планирал да подигне екс-премиерот. Одобрение за градба општина Центар дала во 2011 – та година. Требало да ја гради фирма, а според обвинителството, Груевски требало да биде таен сопственик.

Решението за градба веќе не важи затоа што градењето не почнало на време иако биле платени комуналии близу 60 илјади евра. Освен Груевски, во овој случај обвинет е и бизнисменот Орце Камчев. Тој денеска се пожали на понижувачки однос во затворот Шутка. На 5 – ти месецов бил однесен во Обвинителството за организиран криминал за случајот „Империја“. Но, пред да стигне, бил – како што рече – понижувачки претресуван.

„Бев претресуван надвор од зградата, меѓу двете комбиња и се исмејуваа затвореници надвор, од прозорите, значи не во внатрешен дел, туку на трева. И прв пат ми беа лисиците позади грб врзани и стегнати и не можев да седам во комбето бидејќи клупата беше само 20-30 сантиметри и цело време се седеше на земја. Беше едноставно изживување. Толку сакам да кажам. Тоа се констатираше отпосле и со повредите на рацете и го пријавив настанот во Обвинителството“, рече Камчев.

Според обвинението за случајот „Плацеви на Водно“, првообвинет е Груевски кој се гони дека наводно присвоил 1,3 милиони евра од донациите во ВМРО-ДПМНЕ за да ги купи атрактивните плацови. Освен Груевски, обвинет е и поранешниот директор на УБК Сашо Мијалков, мајката на Орце Камчев и кумот на Груевски, Ристо Новачевски. Овој случај го отвори веќе згаснатото Специјално обвинителство на Катица Јанева.

Бојан Стојановски