Зафатени сите термини за цела недела за брзите тестови за Ковид-19
Пристигнаа брзите ПЦР тестови. Тие денеска беа пуштени во употреба само во Здравствениот дом Ѓорче Петров во Скопје. Станува збор за 4 илјади тестови купени само за оваа поликлиника за пациенти од оваа општина и чинат по илјада денари. Термините за следните денови се веќе зафатени и нема слободни за најмалку една недела.
Граѓаните кои не успеале да закажат термин преку услугата „Мој термин“, велат дека морале итно да дојдат на брзи тестови чии резултати излегуваат од 15 до 30 минути. Секој е должен да пополни извештај со лични податоци и симптоми или контакти, а оние кои имаат позитивен тест потпишуваат изјава за самоизолација.
Во меѓувреме, од 13 илјади брзи тестови кои се донација, денеска на адреса на Министерството за здравство стигнаа 3 илјади, другите се очекуваат до задутре. Од министерството велат дека тестовите ќе бидат дистрибуирани во 13 државни болници, поточно на Инфективната клиника во Скопје, болницата „8 Септември“, Институтот за белодробни заболувања во Козле и Институтот за туберкулоза во Скопје.
Министерство за здравство:
„За ултра-брзите тестови не треба да се плаќа. Тие ќе бидат утврдени преку системот на евиденција Мој-термин, алгоритам кој ќе биде специфичен за тоа кои категории ќе бидат тестирани итно, секогаш според препораките на СЗО.“
Во меѓувреме, со предвидените државни пари од ребалансот на буџетот, според Министерството за здравство, нарачани се уште 100 илјади брзи тестови кои ќе бидат бесплатни за граѓаните, но сè уште не е познато по која референтна цена ќе бидат покриени од Фондот за здравство.
Аднан Ќаили
