Фудбалерите на Воска Спорт ќе го дочекаат Силекс во рамките на 20. коло на Првата Македонска Фудбалска Лига. Охриѓани по поразот од Шкупи му врачија отказ на Миљан Радовиќ, а сега нов предводник на тимот е Срѓан Захариевски.
Во пресрет на натпреварот против кратовчани, Захариевски ги сподели првите импресии од Охрид, Воска и го најави деби-мечот.
„Атмосферата во тимот е добра, гледам нова енергија. Овие денови бевме фокусирани само на натпреварот против Силекс и работевме само во таа насока. Нè очекува тежок натпревар, каде што поените се важни за двата тим. Се надевам дека ќе бидеме на посакуваното ниво и трите бода ќе останат во Охрид“, изјави новиот тренер на Воска.
Исто како и останатите четири натпревари од ПМФЛ, неделната пресметка на „Билјанини Извори“ се игра во терминот од 14:00 часот.
