ЗНМ: Остра осуда за нападот врз новинарска екипа на АЛСАТ М во Визбегово
Здружението на новинарите на Македонија најостро го осудува денешниот физички напад врз новинарската екипа на телевизијата АЛСАТ М, која известуваше за големиот пожар на дивата депонија во Визбегово.
Според информациите од колегите, новинарот Авни Тахири и снимателот Шенол Хајредини од екипата биле физички нападнати од лице сопственик на отпадот за кој се смета дека го предизвикал пожарот. Напаѓачот насилно му го одзел мобилниот телефон на новинарот Тахири и го фрлил во огнот, а снимателот Шенол Хајредин бил исто така нападнат и му била скршена камерата. Лицето е уапсено од страна на Министерството за внатрешни работи, а случајот е пријавен во МВР.
ЗНМ е во комуникација со контакт точките во МВР и ОЈО за заштита на новинарите и медиумските работници.
Потсетуваме дека со последните измени во Кривичниот законик секој напад врз новинари при извршување на нивната професионална задача е сериозно кривично дело за кое се предвидени законски казни.
Очекуваме од институциите брза и ефикасна истрага, со соодветна санкција за напаѓачот.
