Истекува рокот за изградба на автопатот, но на Кичево – Охрид не му се гледа крајот
За три месеци завршува крајниот рок кој Благој Бочварски, министерот за транспорт и врски и Ејуп Рустеми, директорот на јавното претпријатие за државни патишта, го дадоа дека ќе биде пуштен во употреба автопатот Охрид-Кичево. Тоа е до крајот на оваа година. Но, на теренот, крајот на работите сè уште не се гледа. Туристичките работници велат дека дека странските туристи почнуваат да ги заобиколуваат Охрид и Струга ако треба да дојдат со возило.
„Сè што ќе кажам е неважно кога го гледаме ова ругло овде на влезот во Охрид. Многу луѓе го избегнуваат Охрид, посебно традиционалните гости кои ги имавме од Србија и веќе го избегнуваат овој пат и чекаат да се направи. Има луѓе кои прашуваат кога ќе го направите автопатот за да дојдеме, не сме дојдени 10 години…“, рече Олег Маленко-туристички работник.
Но, иста слика ги чека и оние кои ќе дојдат со авион.
„Автобусите кои доаѓаат на аеродром да ги земат странските туристи, кога ќе излезат, првата слика на гостите е како да доше во Бејрут или во некоја таква држава…“, вели Крсте Блажески-претседател на ХОТАМ.
Туристичките работници денеска имаа средба со лидерот на ВМРО-ДПМНЕ, Христијан Мицкоски. Toj рече дека според она што се гледа на теренот, овој автопат не ѝ е воопшто приоритетен на Владата. Им рече дека во партијата во моментов прават скрининг на состојбата и фазата на изградба во која се наоѓа автопатот, по што, како што рече, кога ќе дошле на власт, ќе имаат точен рок за негово завршување.
Мики Трајковски
