Драма во авион: Поради силни турбуленции едно лице загина, неколку се повредени
Едно лице загина, а неколку се повредени на летот од Лондон до Сингапур кој го погодија силни турбуленции, јави авиокомпанијата, пренесува Би-би-си.
Авионот „Боинг 777-300ЕР“, кој летал за Сингапур, бил пренасочен кон Бангкок и слетал во 15:45 часот по локално време.
Во авионот имало вкупно 211 патници и 18 членови на екипажот, се наведува во соопштението за печатот на Сингапур ерлајнс, кое изразува сочувство до семејството на починатиот.
Singapore Airlines flight #SQ321, operating from London (Heathrow) to Singapore on 20 May 2024, encountered severe turbulence en-route. The aircraft diverted to Bangkok and landed at 1545hrs local time on 21 May 2024.
We can confirm that there are injuries and one fatality on…
— Singapore Airlines (@SingaporeAir) May 21, 2024
Сингапур ерлајнс соопшти дека работи со локалните власти во Тајланд за да обезбеди итна медицинска помош и дека испраќа тим во Бангкок за да обезбеди дополнителна помош.
– Наш приоритет е да им обезбедиме секаква можна помош на сите патници и членови на екипажот во авионот, се наведува во соопштението.
Тајландските власти испратија брза помош на аеродромот Суварнабхуми.
Сè уште не е целосно јасно што точно се случило во авионот. Дописникот на Скај њуз од Азија известува дека има некои индикации дека авионот удрил во воздушен џеб пред итно слетување.
– Повредите предизвикани од сериозни турбуленции се релативно ретки во контекст на милиони летови. Сепак, тешките турбуленции можат да бидат драматични и да доведат до сериозни повреди или, за жал, како во овој случај, смрт, изјави за Би-Би-Си експертот за општа авијација Џон Стрикленд.
– Авиокомпаниите препорачуваат безбедносните појаси да останат барем лабаво врзани во текот на целиот лет, без разлика дали е долг или краток. Тоа предупредување не е залудно, додаде Стрикланд.
Турбуленциите се вообичаени на летовите, но сериозните инциденти како овој се ретки, а турбуленциите обично не се загрижувачки.
Понекогаш тие може да се предвидат, а познато е дека пилотите комуницираат меѓу себе преку радар за да ги предупредат другите, но турбуленциите исто така може да се појават одеднаш. Иако е привремен феномен, тие можат да се случат секаде и под какви било услови.
