Со секој нов снег, доаѓа и ново ветување за инвеститор на Шапка
Со секој нов снег, доаѓа и ново ветување за инвеститор на Шапка
Со повеќе од 186 милиони евра, се очекува туристичкиот центар „Попова шапка“ да биде модернизиран и да се развие. Тоа се планира да му биде доверено на италијанскиот инвеститор „ТекноАлпин“. Зелено светло било дадено на вчерашната седница на Владата. Следната година се очекува да започнат првите работи. Директорот на Елем Турс, државна фирма којашто стопанисува со Попова Шапка, вели дека инвестицијата треба да помине низ шест фази.
„Во првата фаза се планирани над 55 милиони евра, а како резултат на неа инвестиција ќе имаме нови ски-патеки, нови ски-лифтови и жичарници, ќе се реновира хотелот Славија, ќе се изградат нови хотели, над 600 нови паркинг места, ќе се прилагоди патниот пристап од Попова Шапка до ски-патеките, вреди да се напомене дека во првата фаза се планира да се инвестира и во систем за вештачки снег“, рече Адем Авзиу, директор на Елем Турс.
Ова не е првпат вакви проекти да започнат, но остануваат без епилог. Тоа што гарантирало овој пат, според Авзиу, била сериозноста на инвеститорот.
„Сè што е депонирано во бизнис-планот на инвеститорот, кој е многу сериозен, во мастер-планот, во макро и микро-инвестициските точки е доволна гаранција дека инвеститорите се сериозни. Исто така финансискиот план, финансискиот извештај на инвеститорот е доста обемен, што е дополнителна гаранција“, додаде тој.
Инаку, власта со години ветува потенцијални инвеститори на Попова Шапка. Поранешниот премиер Зоран Заев во Националната стратегија 2021-2027 го вклучи и доделувањето на 99-годишна концесија за овој туристички центар. Се најавуваа дури и инвестиции од Катар, од Абу Даби, од поранешното ЕЛЕМ. Но, освен шестоседот, Попова Шапка со години не доби никаква нова инвестиција./Alsat.mk
Ардит Рамадани
