По неколку месеци разговори и преговори министрите за енергетика на земјите членки на ЕУ во понеделникот се договорија за воведување плафон на цената на природниот гас, а на прашањето дали ова би имало некакво влијание кај нас, претседателот на Регулаторната комисија за енергетика и водни услуги Марко Бислимоски одговара позитивно и вели дека е добар сигнал, јави дописничката на МИА од Атина.
Механизмот за ограничување на цената на гасот ќе се активира кога цената ќе достигне 180 евра за мегават час и 35 евра повеќе од референтната цена на течниот гас за период од три последователни дена, а воведувањето плафон беше грчки предлог доставен пред неколку месеци.
Во разговор со дописничката на МИА од Атина, Бислимоски изразува надеж и очекување дека оваа одлука ќе има позитивно влијание и кај нас.
– Се надевам дека ќе влијае, имајќи предвид дека и во државата веќе цената за природниот гас ни зависи од цената на ТТФ берзата во Холандија, во најголем дел, 70-ина проценти, а 30 проценти е од нафтениот индекс. Значи, очекуваме дека со поставувањето на овој „price cap“ кој што ќе видиме како функционира и како ќе се имплементира, дека ќе има позитивно влијание кај нас од аспект на намалување на цената на природниот гас, вели Бислимоски.
