Од 16 март во маркетите по пониски цени се продаваат тестенините и млечните производи, откако стапи на сила владината одлука за замрзнување на цените на овие производи. Млечните производи се намалени за околу 10 отсто, а тестенините за 15 проценти.
Претходно владата ја замрзна и цената на белиот и полубелиот леб до 33 денари. Идната недела, пак, се очекува одлука дали ќе се замрзне цената и на други основни прехранбени производи.
Премиерот Димитар Ковачевски и министерот за економија Крешник Бектеши посетија маркет во Скопје, за да проверат дали се почитуваат одлуките и дали тестенините и млечните производи се продаваат по намалени цени.
Со нив беше и директорот на Државниот пазарен инспекторат, Горан Трајковски.
Премиерот Ковачевски вели дека се увериле оти намалувањето на цените се почитува од производителите и од трговците.
