Македонските власти молчат дали и колку државата, би ја чинело евентуалното раскинување на договорот со кинеската компанија Синохидро, која го гради автопатот Кичево-Охрид, како што вчера најавија премиерот Ковачевски и неговиот заменик, Артан Груби.
Дали државата би плаќала пенали, односно обештетување на Кинезите, прашавме во Јавното претпријатие за државни патишта, но одговор не добивме. И министерот за транспорт и врски, Благој Бочварски не сакаше да коментира, само кратко изјави дека одлуката треба да ја донесе Владата и Собранието. Инаку во точка 20 од договорот склучен меѓу Владата на Груевски и кинеската компанија Синохидро од 29 октомври 2013 година, пишува дека надлежен суд при евентуална арбитража е Арбитражниот суд во Париз.
„На десетта година имаме изведувачи од Кина, кои се уште не го завршуваат автопатот и затоа треба да се направи ревизија и врз основа на да се донесе одлука, како да се продолжи, а една од опциите е секако и раскинување на тој договор. Таа ревизија ќе покаже точно кои се елементите кои предизвикале да има толкаво доцнење на патот. Самиот договор претставува закон и секоја негова промена, секој негов анекс се одобрува од пратениците“, рече Ковачевски.
„Нашиот став е дека премногу долго се гради, дека премногу проблеми се, дека административно законските пречки со кои се соочивме таму на изградба на автопатот беа огромни.Огромни проблеми имавме и со проектната документација“, вели Андреја Серафимовски-претседател на здружение за градежништво.
Институтот за демократија работеше на истражување за автопатот и заклучи дека договорот бил склучен и покрај загриженоста на експертите за изводливоста и профитабилноста.
„Владата се одлучи за директно склучување договор отколку постапка за јавна набавка, и покрај позитивните законски одредби.Така, не беа само кинеските функционери, туку исто така и дејствијата на функционерите од Северна Македонија кои дозволија кинескиот капитал во овој случај да стане корозивен“, се наведува во истражувањето на Институтот за демократија.
Автопатот Кичево-Охрид, кој за експертската јавност е црна точка во Македонија почна да се гради во 2014 година. Првичниот рок беше 2018 година, но беше продолжен најпрво за 2021 година, а потоа и за крајот на 2023 година. Во меѓувреме беа донесени и анакси на договорот со што сумата за изградба достигна 600 милиони евра. Станува збор за 57 километри долга автопатска делница, која се гради цели десет години.
Мики Трајковски
