Диви паркинзи во Струга, општината молчи
Во Струга на неколку локации низ градот без проблем работат диви паркинзи на државно земјиште. На еден во центарот на градот, кој се наоѓа во близина и на општина Струга, цената за паркирање е 200 денари за цел ден. Иако Алсат уште на почетокот на годинава пишуваше за дивиот паркинг на женска плажа, каде некој оградил дел од просторот и сè уште нема реакција од надлежните. Во една ваква ситуација реагираат дел од партиите во општината.
„Загрижува фактот што за создадениот проблем и проблемот што се создава секојдневно пред очите на граѓаните, никој од надлежните органи за чување на јавниот имот, не реагирa. Не само што надлежните не реагираат, туку секојдневно се согласуваат со создадениот проблем“, велат од Алијанса за Албанците-Струга.
Од Алијанса ги повикуваат Владата, Министерството за транспорт, Државниот инспекторат за градежништво и урбанизам, општината, полицијата, обвинителството и УЈП, да не молчат за проблемот. Реагираа и од ВМРО-ДПМНЕ.
„И самите плажи се користат како диви паркизни на кои угостителските објекти ги узурпираат тие површини во нивен интерес за гостите да ги паркираат нивните автомобили, без разлика колку е тоа спротивно на законот за безбедност на сообраќајот во патиштата. Во однос на дивите паркизни одговорност има и јавното претпријатие Еко Струга кое е основано од Советот на Општина Струга за да управува со паркинзите…“, рече Ален Деребан- ВМРО ДПМНЕ-Струга.
Но, од Еко Струга велат дека не знаат кои се сопственици на дивите паркинзи.
„Дивите паркинзи не се во наша надлежност на стопанисување. Што се однесува за тоа што сме презеле, од наша страна пријавено е до надлежните институции кои треба да реагираат“, велат од ЈП ЕКО Струга.
Алсат праша во општина Струга зошто се дозволува да функционираат овие нелегални паркинзи, но одговор не добивме.
Мики Трајковски
