Еден гласач може да се појави само еднаш на гласачкото место

Државната изборна комисија го дистрибуираше изборниот материјал до избирачките места, Вториот круг претседателски избори и парламентарните избори утре ќе ги следат 1303 домашни набљудувачи, 860 странски набљудувачи и 83 странски новинари, информираа од ДИК.

Од таму потсетуваат дека гласањето е индивидуално, не е дозволено семејно гласање и не е дозволено фотографирање на гласачкото ливче. Гласачот добива два гласачки ливчиња доколку се одлучи да гласа за двата вида на избори или едно гласачко ливче за изборите за кој се одлучил да гласа и се потпишува во соодветниот извод од избирачкиот список.

„Од изборната комисија ги прашуваат гласачите на кои избори ќе гласаат. Гласачот добива два гласачки ливчиња доколку се одлучи да гласа за двата вида на избори или едно гласачко ливче за изборите за кој се одлучил да гласа. Избирачот може да се појави на гласачкото место само еднаш за да го оствари своето избирачко право“, рече Дитмире Шеху, потпретседателка на ДИК.

ДИК ги повикува избирачките органи да ги почитуваат законите.

На избирачкиот список со право на глас за парламентарните избори се 1 815 350 лица. Оваа бројка е за 1033 лица поголема од избирачкиот список за претседателските избори. Граѓаните во земјава ќе можат да гласаат на вкупно 3480 избирачки места. Гласањето се врши со важечки или истечен документ најрано до 24 јули 2023 година за оние кои гласаат за претседател, а најрано до 8 август 2023 година за оние кои гласаат за парламентарни избори.

Фатлуме Дервиши