Филипче: Трендот на нови случаи е во опаѓање, се очекуваат нови вакцини од различни произведувачи

Мерките даваат резултати, бележиме тренд на намалување на новодијагностицирани случаи со ковид-19, рече на денешната прес конференција министерот за здравство, Венко Филипче. Како што додаде тој, трендот на вакцинирање продолжува, а бројот на вакцинирани лица во текот на еден ден изнесува околу 1200 лица.

Министерот Филипче информираше дека на 19 и 26 април се очекува пристигнување на по 10 000 вакцини од компанијата „Фајзер“, а до крајот на месецов околу 76.000 дози од „Астра Зенека“. Во однос на вакцините коишто треба да бидат набавени од ЕУ, преку трилатерални договори, се очекува да пристигнат првата недела од мај.