Гоце Трајковски кој требаше да сведочи за убиството на Вања и Панче е во бегство
Гоце Трајковски, еден од клучните сведоци во случајот за грабнувањата на 14-годишната Вања Ѓорчевска и велешанецот Панче Жежовски, е осомничен за палање на угостителски објект во скопска Кисела Вода и се наоѓа во бегство.
Ова беше кажано на денешниот брифинг во Јавното обвинителство на Република Северна Македонија на кое обвинители од целата држава одговараа на новинарски прашања за предмети кои изминатиов период предизвикуваат интерес во јавноста.
Трајковски, кој заедно со таткото на Вања, Александар Ѓорчевски водел паралелна истрага по исчезнувањето на девојчето, прибирајќи и прегледувајќи снимки од камери, за овие активности првично требаше да сведочи на рочиштето за предметот што се одржа на 15 ноември.
Но, тој тогаш не се појави, а оправдувањето беше дека имал паничен напад и висок притисок.
Два дена пред овој датум, Трајковски, според скопското Основно јавно обвинителство, учестувал во опожарување на угостителски објект лоциран во станбен објект во кој имало станари.
Известувањето дека Трајковски е во бегство, Обвинителството го добило вчера.
