Јапонскиот град Хирошима на 6 август ја одбележа 76-годишнината од првиот светски напад со атомска бомба, а градоначалникот ги повика лидерите во светот да го елиминираат нуклеарното оружје. „Нуклеарното оружје претставува закана за целосно уништување, што секако можеме да ја надминеме ако сите земји работат заедно“, рече градоначалникот Казуми Мацуи. Околу 140.000 луѓе беа убиени кога САД фрлија атомска бомба врз Хирошима во раните утрински часови на 6 август 1945 година. Три дена подоцна, втора атомска бомба беше фрлена врз градот Нагасаки, при што загинаа околу 70.000 луѓе. Јапонија капитулира на 15 август.
Јапонскиот премиер Јошихиде Суга, исто така, присуствуваше на комеморацијата во Хирошима и ја истакна потребата за „реален“ пристап кон контролата на вооружувањето. Церемонијата во Меморијалниот парк на мирот во Хирошима беше скромна поради глобалната пандемија на коронавирус. Јапонската национална телевизија НХК ги прикажа главните говори, а потоа брзо се префрли на покривање на тековните Олимписки игри во Токио.
