Ќе се сретнат на Табановце, Вучиќ утре му носи 8.000 вакцини на Заев
Првите дози вакцини Фајзер против ковид утре пристигнуваат во Македонија преку Србија. За 8.000 дози на Табановце ќе има и свечено прифаќање на контингентот, а ќе присуствуваат лично српскиот претседател Александар Вучиќ и премиерот Заев. Тој пак, денеска не покажа голем ентузијазам бидејќи, вели – и онака кинеските вакцини ќе пристигнат на почетокот на првата недела. Први кои ќе се вакцинираат се медицинските лица.
Досега за вакцинација се пријавиле 4.000 здравствени работници. Останатите граѓаните кои се во загрозените категории мора да го сторат тоа преку Интернет. Но, во текот на денешниот прв ден на отворањето на електронската платформа „вакцинација.мк“, во поголемиот дел од денот таа не функционираше. Од Министерството за здравство велат дека станувало збор за технички проблеми.
Министерство за здравство:
„Во моментов на веб-страницата се вршат најновите технички прилагодувања преку кои граѓаните ќе можат да аплицираат изразувајќи интерес за вакцинација против Ковид-19.“
Според националниот план за вакцинација, имунизацијата ќе се спроведе во три фази, но терминот зависи од снабдувањето со вакцини. Оперативниот план за вакцинирањето беше објавен вчера.
Adnan Qaili
