Кинеските вакцини ќе пристигнат после кинеската Нова Година

Вакцините од Пекинг ќе бидат испорачани после кинеската Нова година, односно после 18 февруари. Ова е ново одложување за прсистигнувањето на анти-ковид вакцините. Претходно беше најавено дека вакцините ќе дојдат најдоцна до 16 февруари. Премиерот Зоран Заев рече дека уплатата за 200 илјади дози од вакцините „Синовак“ е извршена денес. Во меѓувреме, сè уште нема конкретен рок за вакцините Фајзер, кои вчера требаше да пристигнат на Табановце.

 За поранешниот  министер за здравство ова е неприфатливо. Поранешниот министер Арбен Таравари рече дека кулминација на несериозноста е одложувањето на роковите за примање на вакцината, во време кога сите соседни земји започнаа со имунизација на населението.

 „Станавме сеир за светот, станавме за потсмев! Најавите од Филипче и Заев беа дека вакцините ќе дојдат од крајот на јануари, а сега сме средина на февруари. Владата секогаш наоѓа виновник, зависи од тоа како граѓаните го перципираат, Фајзер, Aстра & Зенека, секогаш наоѓаат изговори за нивниот неуспех. Тие едноставно не треба да занимаваат со фармацевтските компании затоа што тие си ја вршат својата работа“, изјави Арбен Таравари, поранешен министер за здравство.

Во меѓувреме, дојде појаснување од американската фармацевтска компанија Фајзер. Не за институциите на земјата, туку за јавноста. Пораката од Њујорк е јасна според глобалните политики за продажба, најважно е нивните вакцини да бидат безбедни при транспорт и складирање.

Аднан Ќаили