Негативното мислење на МВР за државјанствата добило зелено светло и од заменик-министерот Буши
Министерот за внатрешни работи, Оливер Спасовски појасни денеска дека ставот на МВР во однос на отфрлањето на предлозите на албанската опозиција за предлог-законот за државјанствата бил координиран и преку заменик-министерот од редовите на ДУИ, Назим Буши. Но, се чини дека тој бил немоќен да го спречи донесувањето на таквиот став на ресорот.
„Н: Дали вашиот заменик, господинот Буши се согласи со мислењето? О: Тоа е мислење на МВР и мислам дека е сосема јасно. П: Се согласи или не? О: Ако е став на МВР тогаш е став на сите по хиерархија тука.“
Предлогот на опозициската албанска коалиција, кој МВР го отфрли, беше до државјанство да се стига со тројца сведоци, наследување на државјанство од прва и втора генерација, наследно државјанство врз основа на брак и добивање на статус на државјанин со познавање само на албанскиот како службен јазик во државава. Во однос на иднината на овој закон, Спасовски нагласи дека евентуален нов предлог-закон единствено може да предложи неговото министерство.
„Ние разработуваме можни варијанти на Законот за државјанство. Кога ќе бидеме подготвени ќе ѝ соопштиме на јавноста. Ќе го доставиме до Влада. Ќе помине на Влада и ќе оди во Собрание. Носење на вакви решенија кои повеќе се политички памфлети и од самиот текст на Законот нема да сфатите што сакаат оние кои го предлагаат…“
Спасовски алудира на нацрт-закон што го предложија Алијанса за Албанците и Алтернатива. Освен тоа, министерот тврди дека Деловникот за работа на Собранието предвидувал Владата преку МВР да побара мислење за предлогот на опозицијата.
Bojan Stojanovski