Нови антикризни мерки по ребалансот на буџетот
Министерството за финансии најави дека по усвојувањето на ребалансот, во најкраток рок ќе почне спроведување на новите антикризни мерки кои ќе бидат таргетирани. Оттаму информираат дека во ребалансот се проектирани околу 76 милиони евра за антикризни мерки, како и за субвенции за покачување на минималната плата, пари за зголемување на пензиите и дополнителни средства за субвенции за земјоделците.
„Грижата за граѓаните и економијата ќе продолжи, додека исто така ќе продолжи определбата за водење прудентна фискална политика, која е во насока на намалување на буџетскиот дефицит на среден рок“, се наведува во денешното соопштение од Министерството за финансии.
Оттаму појаснуваат дека со ребалансот, и покрај одреденото проширување на дефицитот, тој сепак е под нивото во 2021 година и значително под нивото од кризата 2020 година.
„На среден рок се планира стеснување на буџетскиот дефицит преку подобрување на наплатата на буџетските приходи, мерки за намалување на сивата економија и за спречување; намалување и реструктурирање на буџетските расходи, финансирање и реализација на одредени проекти преку јавно-приватни партнерства и основање на Развоен фонд“, велат од Министерството за финансии.
