Пендаровски: Ако преговарачкиот процес стане само уште една балканска бескрајна приказна, атрактивноста на ЕУ ќе достигне историски најниско ниво
Ако преговарачкиот процесот стане само уште една балканска бескрајна приказна, атрактивноста на Европската унија ќе достигне историски најниско ниво, истакна денеска претседателот Стево Пендаровски во обраќањето на свечената церемонија по повод почетокот на новата академска година на Колеџот на Европа во кампусот Натолин во Варшава, во рамки на официјалната посета на Република Полска.
Пендаровски, како што соопшти неговиот Кабинет, истакна дека е почестен што говори на отворањето на академската година, на 30-годишнината од основањето на колеџот, што е признат за неговиот вреден придонес за интеграцијата на Централна и на Источна Европа во Европската Унија.
Во своето обраќање претседателот Пендаровски рече дека перспективата за членство во Европската Унија е прашање за кое постои широк социјален и политички консензус во регионот, истакнувајќи дека со прогласувањето на независноста во 1991 година, во нашата држава веќе беше постигнат национален консензус за европската иднина.
Претседателот Пендаровски оцени дека европските интеграции имаат единствен потенцијал да бидат катализатор за длабока трансформација на сите слоеви на нашето општество. Владеењето на правото, независното судство, антикорупцијата и слободата на медиумите, како што рече претседателот, не се обврска на Брисел, туку на политичките елити и тие треба да ја сносат одговорноста. Но овој процес, според претседателот Пендаровски, треба да биде двонасочен, со цел да биде ефективен, и како што нагласи, пристапот на Европската Унија кон интеграцијата на Западниот Балкан треба да биде храбар, а не колеблив.
