Протестите на северот на Косово влегуваат во шестиот ден, ноќта помина мирно
Србите остануваат на барикадите, во знак на протест поради апсењето на Дејан Пантиќ и присуството на специјалните единици на косовската полиција. Ноќта на северот на Косово помина мирно, а протестите влегуваат во шестиот ден.
Дополнителни тензии во и онака напнатата ситуација донесе изјавата на шефот на ЕУЛЕКС, Ларс Гунар Вигемарк, за „Косово онлајн“ кој рече дека мисијата на ЕУ има контрадикторни информации за уапсениот Дејан Пантиќ и дека сè уште не знаат каде се наоѓа. Ова сега се проверува, вели тој, и додава дека ќе испрати полициска единица и полициски советник во Лепосавиќ.
Инаку, српскиот претседател Александар Вучиќ се сретна со специјалниот претставник на Европската Унија за дијалог меѓу Белград и Приштина и други регионални прашања од Западен Балкан, Мирослав Лајчак и заменик-помошникот државен секретар на САД, Габриел Ескобар. Разговорот, како што вели, бил искрен и фер.
