Ноќва во арените ширум Соединетите Американски Држави се одиграа неколку возбудливи натпревари во НБА лигата, а за издвојување се победите на Сакраменто Кингс над шампионот и на Лос Анџелес Лејкерс над Њу Орлеанс.
Се очекуваше дека ќе биде еден од најинтересните натпревари на вечерта, но освен првата четвртина, дуелот меѓу Сакраменто Кингс и Денвер Нагетс, се претвори во апсолутна доминација на „кралевите“, кои на крај победија со убедливи 135-106.
Иако Монк беше најефикасен во победничкиот тим со 23 поени, Домантас Сабонис буквално направи сè на теренот, а тоа го покажуваат неговите „трипл-дабл“ бројки – 17 поени, 17 скока и 10 асистенции. За шампионот одличен беше Никола Јокиќ кој натпреварот го заврши со 23 поени, 8 скока и 7 асистенции.
Убедлив беше и тимот на Лос Анџелес Лејкерс, кој по поразот од Денвер во претходното коло, сега го надигра Њу Орлеанс и пред својата публика славеше со 139-122.
„Езерџиите“ одиграа еден од најефикасните натпревари во сезоната, а особено расположени за поени беа во втората четвртина, во која постигнаа дури 51 поен. Токму во тие дванаесет минути беше направена разликата, затоа што гостите постигнаа 16 поени помалку.
Леброн натпреварот го заврши со 21 поен и дури 14 асистенции. За поразениот тим прв поентер беше Вилијамсон со 30 поени.
РЕЗУЛТАТИ
Филаделфија – Атланта 121-127
Бостон – Вашингтон 133-129
Торонто – Хјустон 107-104
Милвоки – Шарлот 120-84
Сакраменто – Денвер 135-106
ЛА Лејкерс – Њу Орлеанс 139-122
