Само 169 Бугари во Македонија се пријавиле за гласање на бугарските избори, во Охрид ниту еден
Само 169 бугарски државјани кои живеат во Македонија се пријавиле да гласаат на парламентарните избори во Бугарија што ќе се одржат на 2 април годинава.
Станува збор за лица кои ќе гласаат на избирачките места што на денот на изборите во Бугарија ќе бидат отворени во Северна Македонија, како и во други држави во Европа и светот.
Списоците на пријавени за гласање се објавени на веб-страницата на бугарското Министерство за надворешни работи од седум избирачки места во исто толку градови во земјава, ќе се гласа во шест: Скопје, Битола, Кавадарци, Прилеп, Струмица и Тетово. Избирачко место е предвидено и во Охрид каде беше отворен и бугарскиот клуб „Цар Борис Трети“, но за таму не се пријавил никој.
„Списокот не е предмет на објавување бидејќи нема лица кои изразиле желба да гласаат“, пишува за избирачкото место во Охрид.
Во шесте останати градови, пак, најмногу гласачи ќе има во Кавадарци и Прилеп, а најмалку во Битола што е градот каде се отвори бугарскиот клуб „Ванчо Михајлов“.
