Во првата недела на ноември се очекува да започне вакцинацијата против сезонски грип. Од центрите за јавно здравје велат дека се подготвени, но чекаат дозвола од Министерството за здравство за да започнат со спроведување на овој процес. За разлика од лани кога поради пандемијата беше низок интересот на граѓаните за вакцинација против сезонски грип, лекарите велат дека годинава очекуваат да имаат значително повеќе луѓе кои сакаат да се имунизираат.
„Мислам дека оваа година дефинитивно ќе има поголем интерес бидејќи постојано нè прашуваат дали е пристигната вакцината против грип, верувам дека ќе има голем интерес. Мислам дека цената на вакцината ќе биде иста нема да се промени, бидејќи се уште немаме потврда од Министерството за здравство, чекаме да се потврди цената и ќе започнеме со вакцинација“, вели Лулзиме Бајрами, Центар за јавно здравје, Скопје.
Од Министерството за здравство велат дека се очекува во наредниот период да стигнат и бесплатни вакцини за ранливите категории граѓани. Во меѓувреме пристигнаа и други комерцијални вакцини кои граѓаните ги плаќаат од својот џеб.
„Министерството за здравство потпиша договор за набавка на 40.000 дози вакцини против грип. Испораката на вакцините зависи од производителот. Во моментов се планира да бидат бесплатни 40.000 дози за загрозените категории граѓани, меѓу кои се постарите над 65 години, хронично болните, трудниците и децата од шест месеци до пет години“, велат од Министерството за здравство.
Цената на вакцината за сезонски грип е 800 денари. Надлежните велат дека не се очекува ново поскапување. Пред две години вакцината чинеше 600 денари, а лани поскапе. Пред неколку години оваа вакцина чинеше 400 денари. Во однос на приемот на вакцината против Ковид и онаа против сезонски грип, Комисијата за имунизација препорачува 14 дена разлика меѓу едната и другата вакцина.
Вјолца Алити
