Штрајк на новинарите во Грција
Грција од утрово е без вести и информативни емисии поради 24-часовниот штрајк на новинарите организиран од Грчката федерација на новинарски асоцијации во која учествуваат сите новинарски здруженија, а главното барање е потпишување колективни договори во сите медиумски сектори, односно телевизии, весници, списанија, интернет, радија, јави МИА.
Штрајкот започна од 5 часот и ќе трае до утре наутро, во наредните 24 часа на телевизиите нема да се емитуваат вести и информативни емисии, а во штрајкот учествуваат и голем дел од информативните портали.
Освен колективни договори, вработените во медиумите бараат и почетна плата од 1 250 евра во сите медиуми; зголемување на платите за 10 отсто врз основа на последните колективни договори за работа; загарантирана плата за работа за време на викендите (плус 25 отсто и слободен ден за сабота и плус 100 проценти за недела); зголемување на надоместокот за испраќање на терен надвор од градот каде што се наоѓаат; дневници од 350 евра за испраќање во воени зони и 250 евра во подрачја погодени од елементарни непогоди.
Дополнително, меѓу барањата се и вклучување на етичките принципи во договорите, договор за регулатива за тужбите (anti-slapps); обврзувачки правила за вештачка интелигенција во медиумите; заштита на авторските права на новинарите итн.
Во 24-часовниот штрајк освен приватните медиуми учествуваат и државната телевизија ЕРТ и државната новинска агенција АНА-МПА.
