Американскиот претседател Доналд Трамп планира денеска да потпише извршна наредба со која ќе нареди затворање на Министерството за образование на САД, изјави претставник на Белата куќа. Овој чекор претставува исполнување на неговото предизборно ветување за елиминирање на оваа институција, која долго време беше мета на конзервативците.
Трамп често го нарекуваше Министерството за образование расипничко и под влијание на либералната идеологија. Сепак, евентуалната елиминација на Министерството е веројатно невозможна без акција на Конгресот, бидејќи одделот е основан во 1979 година со акт на Конгресот.
Според Белата куќа, наредбата ќе ја упати секретарката Линди Мекмахон да ги преземе сите неопходни чекори за да овозможи затворање на Министерството за образование и враќање на образовните овластувања на државите, а истовремено да продолжи да обезбедува ефикасна и непречена испорака на услуги, програми и придобивки од кои зависат Американците.
Администрацијата на Трамп веќе спроведува намалување на персоналот во министерството, додека финансирањето на Канцеларијата за човекови права и Институтот за образовни науки, кои собираат податоци за академскиот напредок на земјата, е драстично намалено, пишува АП.
