Почна 52. седница на собраниската Комисија за финансирање и буџет со што продолжи расправата по Предлог-буџетот за 2023 година.
Ова е трет ден од општиот претрес, а збор, според редоследот на пријавени, прва имаше пратеничката Жаклина Пешевска од ВМРО-ДПМНЕ. Пешевска најпрво го повтори партискиот став, дека предложениот буџет е историски највисок, инфлаторен и расипнички, а потоа изнесе и оценки за досегашната работа на власта.
За реплика се јави Диме Влековски од СДСМ кој во моментов ги објаснува буџетските проекции.
На седницата е присутен заменик-министерот за финансии, а првиот ден Предлог-буџетот го образложи министерот Фатмир Бесими. Согласно проекциите, вкупните приходи се планирани на ниво од 282,1 милијарда денари и се за 14,8 отсто повисоки во однос на 2022 година, додека расходите се планирани на ниво од 324,8 милијарди денари или се за 12,6 проценти повисоки во однос на 2022 година. Буџетскиот дефицит е проектиран на ниво од 4,6 отсто од планираниот БДП или на 42,7 милијарди денари, додека вкупните расходи на 324,8 милијарди денари што е за 36,3 милијарди денари повеќе во однос на Буџетот за 2022 година.
