Унгарија следната недела ќе го ратификува членството на Шведска во НАТО
Владејачката унгарска партија ФИДЕС на 26 февруари во Парламентот ќе гласа за ратификација на членството на Шведска во НАТО, а партијата ќе го поддржи, објави денеска на Фејсбук претседателот на парламентарната група ФИДЕС, Мате Кочис.
Шведскиот министер за одбрана Пол Јонсон денеска (20 февраури) изјави дека ја поздравува веста дека унгарскиот парламент следната недела ќе гласа за членството на неговата земја во Алијансата.
На 5 февруари членовите на партијата на унгарскиот премиер Виктор Орбан ја бојкотираа вонредната седница на парламентот на која требаше да се гласа за ратификација на влезот на Шведска во НАТО, со што дополнително го одложија тој прием.
Владејачката партија Фидес, која има апсолутно мнозинство во парламентот, го блокира шведското членство од јули 2022 година, велејќи дека шведските политичари кажуваат „флагрантни лаги“ за состојбата на унгарската демократија.
