Европскиот комесар за соседство и проширување Оливер Вархеји денеска ќе го претстави пакетот за проширување за 2021 година, вклучувајќи извештаи од Европската комисија за земјите кандидати и потенцијалните кандидати за членство во Европската унија. Во својот говор пред членовите на Комисијата за надворешна политика на Европскиот парламент тој се очекува да ја потврди посветеноста на ЕУ кон процесот на проширување, сѐ додека земјите кандидати спроведуваат кредибилни реформи и го почитуваат владеењето на правото.
Пакетот за проширување се усвојува секоја година од ЕК и вклучува проценка на ситуацијата во процесот на пристапување и спроведување на реформите во седум земји кои сакаат да се приклучат на ЕУ. По оценката на Комисијата за реформите во секоја земја во процесот на европска интеграција, известувачите на Комисијата за надворешна политика на Европскиот парламент ќе изготват резолуции за тие земји со заклучоци и препораки од Европскиот парламент.
