(ВИДЕО) Италија се бори со повеќе од 500 пожари, на Сицилија измерени 48,8 степени

Антициклонот наречен Луцифер надвисна над Италија, создавајќи екстремно високи температури и постави нов европски рекорд од 48,8 Целзиусови степени во средата на Сицилија.

Јужна Европа се соочува со интензивни топлотни бранови и шумски пожари ова лето, додека смртни случаи се регистрирани и во Грција и Турција, а експертите предупредуваат дека климатските промени ги зголемуваат интензитетот и зачестеноста на ваквите екстремни временски настани.

Неподносливата жештина ќе продолжи во Италија уште неколку дена и ќе создаде ризик од пожари кои веќе зафатија голем дел од југот на земјата, особено на Сицилија и во регионот Калабрија.

Изгорено тело на 79-годишен маж беше пронајдено во средата во областа Реџо Калабрија, додека друг маж, на возраст од 77 години, почина во истиот регион откако се обиде да го заштити своето стадо од пламените јазици, пренесоа италијанските новински агенции.