Во текот на месец март во земјава се регистрирани 32 случаи на заболени од шуга, се вели во официјалниот извештај на Институтот за јавно здравје. Најголем број заболени има во Скопје и Куманово кај школски деца. Но, надлежните велат дека оваа бројка не е причина за паника кај граѓаните. Од јануари до март бројот на заболени од оваа заразна болест е 70.
„Шугата е паразитско заболување кое се шири во група. Главно се шири поради слаба хигиена почнувајќи од рацете, со близок контакт со позитивни случаи. Не е проблем бидејќи бројката е мала, но се препорачува наставниците да внимаваат на случаите во училиштата, да ги упатат и контролираат“, рече Шабан Мемети, директор на Институтот за јавно здравје.
Покрај шугата, во моментов најраспространета заразна болест во земјава е овчата сипаница, потоа стомачни инфекции.
„Во текот на месец март најчеста заразна болест која е регистрирана е сипаница со вкупно 911 заболени. Споредено со февруари 2023 година, има зголемување на случаите за 30,1%. На второ место според бројот на регистрирани во месец март се заболените од енроколитис со 168 случаи. Во однос на месец февруари, забележан е пораст на заболените од ентероколитис за 52,7%“, наведуваат од Институтот за јавно здравје.
Во месечната табела на Институтот за јавно здравје, меѓу другите заразни болести кои се регистрирани во месец март, има и 7 случаи на хепатитис Б.
Вјолца Алити
