12 persona u lënduan kur një raketë ruse goditi një qytet ukrainas jo shumë larg centralit bërthamor

Një raketë ruse goditi një zonë banimi të një qyteti jugor të Ukrainës, jo larg një centrali bërthamor të shtunën, duke plagosur 12 civilë dhe duke rritur frikën për një aksident bërthamor gjatë luftës në Ukrainë, thanë zyrtarët ukrainas.

Vitaliy Kim, guvernatori i rajonit të Mykolaiv tha në Telegram se katër fëmijë ishin në mesin e të plagosurve në një sulm që dëmtoi disa shtëpi private dhe një ndërtesë apartamentesh pesëkatëshe në Voznesensk.

Qyteti është rreth 30 kilometra (19 milje) nga Centrali Bërthamor i Pivdennoukrainsk (PNPP), i dyti më i madhi në Ukrainë.

Zyra e prokurorit të përgjithshëm në rajonin e Mykolaiv-it, duke përditësuar numrin e mëparshëm, tha se 12 civilë ishin plagosur.

Energoatom i drejtuar nga shteti, i cili menaxhon të katër gjeneratorët e energjisë bërthamore të Ukrainës, e përshkroi sulmin në Voznesensk si “një akt tjetër të terrorizmit bërthamor rus”.

Alarmet për sulme ajrore u dëgjuan disa herë në rajonin e Mykolaiv të shtunën.