5 mrekulli të botës që mund t’i shihni sot

Nga mrekullitë e lashta të botës, vetëm njëra mbijeton sot, Piramida e Madhe e Gizës. Të tjerat, si Tempulli i Artemisit, Statuja e Zeusit në Olimp, Mauzoleu në Halikarnas, Kolosi i Rodosit, Far i Aleksandrisë dhe Kopshtet e Varura të Babilonisë, nuk ekzistojnë më.

Megjithatë, ekzistojnë mrekulli madhështore që ende mund të vizitohen sot. Ja pesë prej tyre që mund t’i shihni vetë:

1. Çiçen Itza

Çiçen Itza, një nga qytetet më të mëdha të majave, ndodhet në Gadishullin e Jukatanit të Meksikës, rreth 193 kilometra nga Kankuni. Ky qytet përfshinte një popullsi të larmishme dhe një shumëllojshmëri stilesh arkitekturore. Ekspertët sugjerojnë se Çiçen Itza u ndërtua diku midis viteve 400 dhe 600 pas Krishtit. Qyteti ishte një qendër e rëndësishme politike, tregtare, fetare, ushtarake dhe ekonomike e kulturës Maja.

Në atë kohë, qyteti kishte një sistem rrugësh të shtruara dhe trotuare që lidhte ndërtesat, diçka që Europa nuk e kishte ende. Në kulmin e tij, mendohet se deri në 50,000 njerëz jetonin në qytet, duke zënë një hapësirë prej pak më pak se 3.2 kilometra katrorë. Një nga atraksionet më të njohura janë shkallët e piramidës së njohur si “El Castillo”, të cilat dikur vizitorët mund t’i ngjisnin. Për të ruajtur shkallët, tani vizitorëve nuk u lejohet më t’i ngjiten.

2. Petra 

Qyteti parahistorik i Petrës ndodhet në Jordani, mes Detit të Kuq dhe Detit të Vdekur. Ky qytet është një vend arkeologjik i famshëm botërisht dhe quhet edhe “Qyteti i Trëndafiltë”, për shkak të ngjyrës së gurëve nga të cilët është gdhendur. Petra ishte shtëpia e nomadëve arabë të njohur si nabateanët dhe u themelua në vitin 312 pas Krishtit.

Historianët ende nuk e dinë pse këta njerëz nomadë vendosën të qëndrojnë në këtë zonë, por dihet se nabateanët ishin të aftë në gdhendje, ndërtim, tregti dhe inxhinieri. Arkitektura e qytetit përfshinte varre dhe tempuj, cisterna dhe rezervuarë uji, si dhe ndërtesa publike. Romakët morën kontrollin e Petrës në vitin 106 pas Krishtit dhe sunduan për më shumë se 250 vjet. Në vitin 363, një tërmet shkatërroi shumë nga ndërtesat e Petrës dhe sistemin e saj të furnizimit me ujë. Më vonë, bizantinët e pushtuan qytetin dhe sunduan për 300 vjet të tjera.

3. Muri i Madh i Kinës

I ndërtuar për t’u mbrojtur nga pushtimet veriore, Muri i Madh i Kinës shtrihet për më shumë se 21,000 kilometra. Ndërtimi zgjati mbi 2000 vjet dhe filloi gjatë Dinastisë Qin, duke përfunduar nën Dinastinë Ming.

Ekspertët besojnë se rreth gjysmë milioni punëtorë humbën jetën gjatë ndërtimit, dhe shumë prej tyre u varrosën në mur. Pavarësisht emrit të tij, Muri i Madh nuk është një strukturë e vazhdueshme, por një seri muresh me barriera, fortesa, kulla sinjalizuese dhe kazerma. Materialet e ndërtimit përfshinin tulla, dru, dhe gurë. Punëtorët përdorën llaç të bërë nga orizi ngjitës i përzier me gëlqere dhe gurë gëlqeror të ngrohur.

4. Taxh Mahal 

Perandori Mughal Shah Jahan ndërtoi Taxh Mahalin për të nderuar gruan e tij, Mumtaz Mahal, e cila vdiq duke lindur fëmijën e saj të 14-të. U deshën 20,000 artizanë për 22 vjet për të përfunduar projektin. Ndërtimi filloi në vitin 1632 dhe përfundoi në vitin 1648. Disa veçori të tjera, përfshirë oborrin e jashtëm, shtëpinë e mysafirëve dhe xhaminë, u përfunduan deri në vitin 1653.

Mermeri i bardhë i Taxh Mahalit duket se ndryshon ngjyrë në varësi të orës së ditës. Në mëngjes shfaqet në rozë të çelur, në mesditë bëhet i bardhë i ndritshëm dhe në perëndim duket si portokalli bronzi.

Ka një legjendë që thotë se Shah Jahani urdhëroi amputimin e duarve të punëtorëve pas përfundimit të ndërtimit, në mënyrë që ata të mos mund të ndërtonin asgjë tjetër që mund të rivalizonte Taxh Mahalin, por nuk ka prova arkeologjike apo letrare që ta mbështesin këtë pretendim.

5. Koloseu romak 

Koloseu romak është amfiteatri më i madh i ndërtuar ndonjëherë, me gjatësi 188 metra dhe gjerësi 156 metra. Kishte 80 hyrje dhe gjithsej 230 harqe, prej të cilave vetëm 31 kanë mbijetuar deri më sot. Përveç ndeshjeve të gladiatorëve, këtu zhvilloheshin edhe gjueti kafshësh dhe rikrijime të betejave të famshme përpara një publiku prej 50,000 spektatorësh.

Ndryshe nga teatrot e tjera të asaj kohe, të ndërtuara në shpatet e kodrave për mbështetje strukturore, Koloseu u ndërtua si një strukturë e pavarur. U ndërtua nga rreth 60,000 skllevër për tetë vjet, mes viteve 72 dhe 80 pas Krishtit. Si një nga atraksionet më të famshme në Itali, më shumë se pesë milionë njerëz e vizitojnë çdo vit. / Discover Magazine – Syri.net