Maqedonia refuzon propozimin francez!

Gazetare: Fatlume Dervishi

Nuk ka vendim pozitiv për Maqedoninë e Veriut dhe Shqipërinë në Bruksel. Të dyja vendet u dëshpëruan nga Samiti i BE-së me vendet e Ballkanit Perëndimor meqë nuk kishte vendim për fillimin e negociatave. Menjëherë pas kësaj Shkupi konfirmoi se i kthen shpinën propozimit francez.

Kryeministri Dimitar Kovaçevski tha se propozimi siç është, është i papranueshëm për vendin. Ai ka njoftuar presidencën franceze për linjat e kuqe të Shkupit të cilat duhet të jenë pjesë e kornizës negociuese që ajo të jetë e pranueshme.

“Formulim i qartë për gjuhën maqedonase në kornizën negociuese dhe mbrojtje e qartë e identitetit maqedonas. Çështjet historike nuk mund të jenë kritere në kornizën negociuese. Negociatat mes Maqedonisë së Veriut dhe BE-së duhet të fillojnë para fillimit të procedurës për ndryshimet kushtetuese për përfshirjen e bullgarëve, kroatëve dhe malazezëve në Preambulën e Kushtetutës. Garanca të fuqishme edhe nga Bullgaria, edhe nga BE-ja që Bullgaria nuk do të kushtëzojë me kërkesa të reja jashtë asaj për të cilën do të merremi vesh në kornizën negociuese dhe protokollit bilateral I cili akoma nuk është dakorduar me Bullgarinë”, tha Dimitar Kovaçevski, kryeministër i Maqedonisë së Veriut.

Kryeministri bullgar Kirill Petkov pas samitit tha se kërkesat bullgare tashmë janë kërkesa edhe të BE-së. Nëse propozimi francez pranohet në parlamentin bullgar, Petkov thotë se i mbetet Maqedonisë së Veriut që t’i zbatojë ato për të ecur në rrugën e BE-së.

“Pamë se kërkesat të cilat janë të lidhura me presidencën franceze janë shumë të vështira për t’u pranuar nga Maqedonia e Veriut por mendoj se u bë e qartë se ato nuk janë më vetëm kërkesat e Sofjes, ato duhet të bëhen edhe kërkesat e Evropës. Arritëm që t’i sqarojmë arsyet se pse ajo që ne kërkojmë duhet të pranohet”, u shpreh Kirill Petkov, kryeministër i Bullgarisë.

I zhgënjyer nga Bullgaria dhe nga BE-ja u shpreh kryeministri shqiptar Edi Rama.

“Më lejoni të shpreh keqardhjen time të thellë për BE-në. Ndjej keqardhje për to dhe shpresoj që mund të bëjmë diçka për t’i ndihmuar. Arsyeja nuk është vetëm Bullgaria, le ta themi të vërtetën. Bullgaria është një turp por nuk është vetëm ajo. Arsyeja është fryma e pandershme e zgjerimit, totalisht e pandershme dhe Bullgaria është shprehja më e dukshme e tij”, tha Edi Rama, kryeministër i Shqipërisë.

Përfaqësuesi i lartë i BE-së për zgjerim nuk është i kënaqur me rezultatet e samitit sa i takon Ballkanit Perëndimor.

“Ne nuk jemi ku duhej të ishim me Ballkanin Perëndimor. Sot ne duhej të fillojmë negociatat me Shqipërinë dhe Maqedoninë e Veriut dhe nuk mund ta fsheh zhgënjimin tim. Zhgënjimi im është edhe zhgënjimi i shumë njerëzve. Ne duhet t’i fillojmë dhe ka akoma një shpresë. Unë nuk e di çfarë parlamenti bullgar mund të bëjë në orët e ardhshme por gjërat nuk shkojnë mirë. Kjo tregon edhe një herë se uninanimiteti në marrjen e vendimeve është një problem i madh”, u shpreh Xhozef Borell, përfaqësues i lartë i BE-së për politikë të jashtme.

Presidenti francez Emanuel Makron për mediat ndërkombëtare, pas samitit ka deklaruar se është pak herët që të parashikohet një marrëveshje mes Maqedonisë së Veriut dhe Bullgarisë dhe se orët dhe ditët e ardhshme janë të rëndësishme. Në të njëjtën linjë edhe presidenti i Këshillit Evropian Çarls Mishel. Ai thotë se përpjekjet për arritjen e marrëveshjes mes Shkupit dhe Sofjes vazhdojnë.

Liderët e Ballkanit Perëndimor kanë përshëndetur iniciativën e presidentit Makron për një Bashkësi politike evropiane por kërkojnë qartë që ajo të mos jetë zëvendësim për integrimin.