Mexhiti: Qendër e re diagnostike dhe pajisje të reja mjekësore në Klinikën e Pulmologjisë

Ministri i Shëndetësisë, Fatmir Mexhiti, ka vizituar Klinikën Universitare për Pulmologji dhe Alergologji, me rastin e hapjes së qendrës së re diagnostikuese dhe blerjes së pajisjeve të reja mjekësore në vlerë prej 16 milionë denarë, të siguruara nga Ministria e Shëndetësisë.

“Sot po vizitojmë Klinikën Universitare për Pulmologji me rastin e hapjes së qendrës së re diagnostikuese me të cilën pacientët do të diagnostikohen shumë më shpejt dhe për rrjedhojë do të trajtohen më shpejt. Kjo qendër diagnostike është pajisur me pajisje të reja mjekësore në vlerë prej 16 milionë denarë, mjete të cilat janë siguruar nga Ministria e Shëndetësisë. Pajisja përbëhet nga një kolonë bronkoskopi me një monitor të përshtatshëm, procesor dhe burim drite, si dhe EBUS (ekografi endobronkiale me bronkoskop). Është veçanërisht e rëndësishme që me hapjen e kësaj qendre do të dyfishohet numri i bronkoskopive dhe ekzaminimeve ECHO që do të kryhen këtu në këtë Klinikë. Qendra e re diagnostike është e pajisur edhe me një aparat dixhital me rreze X (RTG) dhe një aparat tomografie kompjuterike. Për përshtatjen e kësaj hapësire janë kryer punë rindërtimi në vlerë prej 10 milionë denarë”, theksoi Mexhiti.