Në sezonin debutues, Palmer barazon rekordin e legjendës së Çellsit

Ylli anglez 22-vjeçar, Koll Palmer ka arritur të barazojë një rekord të madh të legjendës së klubit Frank Lampard, në sezonin e tij debutues me “Blutë”.

Palmer u transferua në verë nga Man. Siti për një shifër mbi 50 milionë euro dhe kjo bëri që të kishte kritika të mëdha për çmimin e paguar. Megjithatë, Palmer ka shpaguar thuajse çdo cent të paguar duke qenë lojtari më i mirë i “Bluve” këtë sezon, me numra të ‘frikshëm’ në sezonin debutues.

22-vjeçari i gjithanshëm shënoi edhe mbrëmjen e së mërkurës në ndeshjen ndaj Brajtonit të fituar nga ekipi londinez me rezultat 2-1. Goli i tij e çon numrin e anglezit në 22 gola në Ligën Premier deri më tani këtë sezon. Kjo do të thotë se Palmer ka arritur rezultatin më të mirë të Frank Lampard në një sezon të vetëm të ligës.

Lampard shënoi 22 herë në sezonin 2009/10. Vetëm Xhimi Flojd Haselbaink dhe Didier Drogba kanë arritur të shënojnë më shumë se 22 gola në një sezon të vetëm të Premier Ligës.