Garda Revolucionare e Iranit thotë se lideri politik i Hamasit është vrarë në Teheran

Garda Revolucionare e Iranit tha se Ismail Haniyeh, lideri politik i Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – është vrarë gjatë një sulmi në Teheran, duke fajësuar Izraelin.

Garda tha se po heton sulmin që la të vrarë Haniyeh, 62 vjeç, përderisa ai ishte në Teheran për të marrë pjesë në ceremoninë e inaugurimit të presidentit të ri të Iranit, Masud Pezeshkian, më 30 korrik.

Garda Revolucionare e Republikës Islamike nuk dha detaje se si u krye sulmi.

Hamasi – që mbështetet nga Irani – konfirmoi lajmin përmes një postimi në Telegram më 31 korrik, duke thënë se Haniyeh u vra “në një sulm ajror në rezidencën e tij në Teheran”.

Pala izraelite ende nuk ka konfirmuar vdekjen e liderit politik të Hamasit.

“Ismail Haniyeh, i cili erdhi në Iran për ceremoninë e inaugurimit të presidentit dhe po qëndronte në një rezidencë të posaçme për veteranët në veri të Teheranit është vrarë me një predhë nga ajri”, shkroi në X Fars, agjencia e lajmeve e lidhur me Gardën Revolucionare Islamike.

Presidenti i Autoritetit Palestinez, Mahmud Abbad, menjëherë dënoi vrasjen, duke e cilësuar “akt qyqar dhe zhvillim të rrezikshëm”, sipas agjencisë shtetërore palestineze të lajmeve, WAFA.

Disa shtete kanë dënuar sulmin. Rusia e ka quajtur “vrasje të papranueshme politike”, ndërkaq Turqia ka paralajmëruar se vrasja e liderit politik të Hamasit do të zgjasë luftën mes Izraelit dhe Hamasit në Rripin e Gazës.

Kur u pyet për sulmin që vrau Haniyeh, sekretari amerikan i Mbrojtjes, Lloyd Austin, u tha gazetarëve në Filipine – ku po zhvillonte një vizitë – se “nuk kam informacione shtesë për t’iu dhënë”.

Më herët gjatë 30 korrikut, Izraeli pretendoi se ka “eliminuar” Fuad Shukr, komandantin e grupit militant, Hezbollah, që Izraeli pretendon se qëndron prapa sulmit me raketa në fundjavë që vrau 12 të rinj izraelit.

Forcat e Mbrojtjes së Izraelit shkruan në X – që më herët njihej si Twitter – se Shukr, ka “drejtuar” sulmet e Hezbollahut.

Grupi libanez, Hezbollah, ende nuk ka reaguar për këtë ngjarje.

Shukr ishte në kërkim nga autoritetet amerikane për përfshirjen e tij të dyshuar në sulmin e vitit 1983 ndaj trupave amerikane në Bejrut. Uashingtoni kishte ofruar 5 milionë dollarë shpërblim për informacione për Shukr, i cili njihej edhe si al-Hajj Mohsin dhe gjendej në listën amerikane të terroristëve.

Hezbollahu, që rrallë mohon sulmet ndaj caqeve izraelite, ka mohuar se është përgjegjës për sulmin e 27 korrikut në Lartësitë e Golanit, të pushtuara nga Izraeli. Por, Izraeli është zotuar se do t’i hakmerret grupit që mbështetet nga Irani.

Izraeli është zotuar se do të vrasë udhëheqësit e Hamasit për shkak të sulmit që grupi radikal palestinez kreu brenda territorit izraelit më 7 tetor, duke vrarë 1.200 persona. Afër 250 të tjerë janë rrëmbyer, disa prej të cilëve që atëherë janë liruar.

Disa nga pengjet kanë vdekur në Gazë, teksa Izraeli po kryen një operacion masiv ushtarak që thotë se ka për synim eliminimin e Hamasit. Disa nga pengjet besohet se ende janë gjallë.

“Vrasja e liderit të Hamasit do t’i bëjë më të vështira negociatat dhe uljen e tensioneve. Gjërat do të bëhen më të dhunshme dhe situata do të përkeqësohet e nuk do të përmirësohet”, tha Areepen Uttarasin, politikan tajlandez i cili është një prej negociatorëve në bisedimet për lirimin e pengjeve që mbahen në Gazë nga Hamasi.

Haniyeh ka qenë pjesë e Hamasit për dekada të tëra dhe u bë shef politik i grupit më 2017. Ai ka jetuar në Rripin e Gazës deri më 2019 dhe më pas ka jetuar në mërgim në Katar.

Gjatë luftës mes Izraelit dhe Hamasit në Gazë, Haniyeh ka udhëtuar nëpër shtetet e Lindjes së Mesme ku ka marrë pjesë në negociatat ndërkombëtare për konfliktin, përfshirë edhe në negociatat për lirimin e pengjeve që ende mbahen nga Hamasi./Radio Evropa e Lirë

Vritet komandanti i lartë i Hezbollahut në një sulm në Bejrut, raporton televizioni izraelit

Izraeli beson se një komandant i lartë i grupit të armatosur libanez, Hezbollah, është vrarë nga një sulm ajror izraelit të martën në Bejrut, raporton transmetuesi publik izraelit.

Më herët, ushtria izraelite tha se sulmi në Bejrut të martën vonë ishte hakmarrje për një sulm raketor tri ditë më parë, ku u vranë 12 fëmijë dhe adoleshentë,

Dy burime të paidentifikuara thanë për transmetuesin public izraelit Kan se Izraeli vlerësoi se “objektivi i sulmit” u vra.

Në një komunikatë për media më herët, ushtria izraelite tha se në shënjestër të sulmit në Bejrut ishte komandanti i Hezbollahut përgjegjës sulmin raketor në Lartësitë e Golanit, të okupuara nga Izraeli, të shtunën, si pasojë e të cilit u vranë 12 të rinj në një fushë futbolli në fshatin Druze.

Dy burime të sigurisë në Liban thanë më herët se në shënjestër ishte Muhsin Shukr, i njohur edhe si Fuad Shukr, shef i qendrës së operacioneve të Hezbollahut. Burimet thanë se ai u plagos rëndë në sulm.

Ministri i Shëndetësisë i Libanit, Firas Abiad, tha për Reuters se në këtë sulm u vra edhe një person tjetër dhe u plagosën 35 të tjerë, prej të cilëve tre rëndë.

Hezbollahu e ka mohuar përfshirjen në sulmin në Golan, por tha se hodhi raketa në një objektiv ushtarak në Lartësitë e Golanit.

Shqetësime për përshkallëzim
Derisa diplomatët po përpiqen ta parandalojë përshkallëzimin, sekretari amerikan i Mbrojtjes, Lloyd Austin, tha se nuk beson se lufta mes Hezbollahut dhe Izraelit është e pashmangshme, megjithëse tha se mbetet i shqetësuar për përshkallëzimin e mundshëm.

Hezbollahu dhe Izraeli, të cilat luftuan për herë të fundit në një luftë të madhe më 2006, kanë shkëmbyer zjarr prej se shpërtheu lufta në Gazë tetorin e kaluar, pasi Hezbollahu filloi sulmet në drejtim të Izraelit për, siç tha, t’u solidarizuar me palestinezët.

Luftimet mes tyre kanë qenë kryesisht të kufizuara në kufi dhe të dyja palët kanë lënë të kuptohet në të kaluarën se nuk kërkojnë luftë mes vete, pavarësisht se konflikti ka nxitur frikën për rrezikun e një luftë të gjerë mes tyre.