Pas sulmeve izraelite, banorët e Bejrutit të frikësuar flenë në plazhe dhe rrugë

Qindra familje të zhvendosura flinin në hapësira publike në Bejrut ndërsa tymi vazhdoi të ngrihej nga periferitë jugore të Bejrutit. Zona u godit nga sulme të rënda ajrore të premten që Izraeli tha se vranë komandantë të shumtë të Hezbollahut, duke përfshirë liderin Hassan Nasrallah. Shumë familje u strehuan në sheshet dhe plazhet publike ose në makinat e tyre në qendër të qytetit.

“Ne u detyruam të largoheshim nga shtëpitë tona, dolëm jashtë dhe erdhëm këtu”, tha Basel Husein, i zhvendosur.

“Ne duam vetëm një vend të sigurt, nuk kemi nevojë për rroba, as ndihmë, as ushqim apo pije”, u shpreh Fatima Zijada, e zhvendosur.

Vala e zhvendosjes vjen së bashku me një përshkallëzim të shpejtë gjatë javës së kaluar që ka vrarë më shumë se 700 njerëz në Liban dhe ka kulmuar me një sërë sulmesh masive të premten dhe gjatë natës që rrafshuan të paktën gjashtë ndërtesa shumëkatëshe.

Zyra e OKB-së për Koordinimin e Çështjeve Humanitare, tha se përshkallëzimi ka dyfishuar numrin e të zhvendosurve nga konflikti në Liban. Tani ka mbi 211,000 njerëz të zhvendosur – duke përfshirë disa nga punëtorët humanitarë që duhet t’i përgjigjen krizës me rreth 85,000 që flenë në strehimore, tha agjencia në një deklaratë.