Sonda hapsinore evropiane kap imazhe unike të Marsit dhe hënës së tij misterioze

Ky fluturim shërbeu për të vendosur sondën në trajektoren e duhur drejt asteroidit Dimorphos, ku do të mbledhë të dhëna pas përplasjes së misionit DART të NASA-s.

Pamje të rralla të Deimos nga një këndvështrim i ri

Qendra Gjermane e Hapësirës Ajrore (DLR) njoftoi se Hera fluturoi pranë Marsit dhe dy hënave të tij, Phobos dhe Deimos, duke siguruar pamje të reja. Imazhet u publikuan gjatë një transmetimi të drejtpërdrejtë nga ESA.

“Ne kemi disa imazhe të bukura nga ana përballë Marsit,” tha gjeofizikani Stefan Ulamec, “por kjo është një nga pamjet më të rralla dhe ndoshta me rezolucionin më të mirë që kemi për anën e largët të Deimos.”

Deimos, hëna më e vogël dhe më misterioze e Marsit, nuk është studiuar aq gjerësisht sa Phobos, dhe çdo imazh i ri është një mundësi e rëndësishme shkencore.

Misioni i Herës: Mbrojtja e Tokës nga asteroidët

Hera është misioni i parë mbrojtës planetar i ESA-s. E nisur në tetor të vitit të kaluar, ajo po udhëton drejt sistemit të asteroidëve Didymos-Dimorphos, ku do të analizojë ndikimin e përplasjes së misionit DART të NASA-s në 2022.

DART u përplas me Dimorphos për të testuar ndryshimin e trajektores së një asteroidi, një teknikë që mund të ndihmojë në mbrojtjen e Tokës nga goditjet e mundshme të trupave qiellorë. Tani, Hera do të mbledhë të dhëna për të konfirmuar efektivitetin e kësaj metode.

“Dy vjet më parë, devijuam një asteroid,” tha menaxheri i misionit Hera, Ian Carnelli. “Tani po kthehemi për të mbledhur të dhënat shkencore që mund të na ndihmojnë ta zbatojmë këtë teknikë për çdo asteroid tjetër që mund të kërcënojë Tokën.”

Pse fluturoi Hera pranë Marsit?

Fillimisht, trajektorja e Herës nuk përfshinte një fluturim pranë Marsit, por ESA e ndryshoi atë për të shfrytëzuar gravitetin e planetit. Kjo manovër:

• Shkurtoi kohën e udhëtimit me disa muaj

• Kursehen një sasi të konsiderueshme karburanti

• Mundësoi kapjen e imazheve të reja të Marsit dhe Deimos

Carnelli e përshkroi këtë teknikë si një mënyrë për të përdorur “një sasi minimale të energjisë për të arritur objektivin”, duke ulur ndjeshëm kostot.
Brian May: “Kjo mund të shpëtojë njerëzimin”

Astrofizikani dhe ish-kitaristi i grupit Queen, Brian May, i cili mori pjesë në prezantimin e imazheve të Herës, theksoi rëndësinë e këtij misioni.

“Nëse nuk zbulojmë në kohë një objekt që po vjen drejt Tokës, atëherë mund të kemi të njëjtin fat si dinosaurët.”

Misione si Hera dhe DART janë një hap kyç drejt ndërtimit të një sistemi të mbrojtjes planetare, i cili në të ardhmen mund të ndihmojë në shmangien e katastrofave të mundshme nga goditjet e asteroidëve.