Strugë/ Dërgohet në spital pa shenja jete një foshnje dy muajsh

Një foshnjë dymuajshe është dërguar në Repartin e Fëmijëve të Spitalit të Strugës këtë mëngjes pa shenja jete, konfirmoi për MIA drejtori i spitalit, Vladimir Bunçeski.

Në stacionin policor të Strugës, siç informoi zëdhënësi i Policisë Shtetërore të Ohrit, Stefan Dimoski, në orën 8:30 të mëngjesit të sotëm, është raportuar se prindërit nga një fshat i Strugës kishin sjellë foshnjën e tyre dymuajshe në repartin e fëmijëve në Spitalin e Përgjithshëm në Strugë, pa shenja jete.

“Një ekip mjekësor filloi reanimacionin, pas së cilës një pediatër e shpalli foshnjën të vdekur. Me urdhër të prokurorit publik, një mjek ligjor kreu autopsi mbi trupin, gjatë së cilës nuk u gjetën gjurmë dhune. Oficerët e policisë nga Policia Shtetërore e Strugës kryen intervista me prindërit, dhe më pas inspektuan shtëpinë e tyre”, tha Dimoski.