Trump: Të qenit president, një profesion shumë i rrezikshëm

Presidenti i SHBA-së, Donald Trump reflektoi të premten mbi kërcënimet ndaj jetës së tij, ndërsa festoi një vendim gjykate që i dha administratës së tij fuqi të gjerë për të ndjekur agjendën e tij politike.

I pyetur nga një gazetar në lidhje me kërcënime të tilla, republikani sugjeroi se atij herë pas here i kujtohet koha kur u gërvisht në vesh nga një plumb, në një tubim fushate në Pensilvani më 13 korrik 2024.

“Kam atë ndjesinë e pulsimit herë pas here,” tha Trump. “Por e dini çfarë? Kjo është në rregull. Kjo është një punë e rrezikshme.”

Të premten, biznesmeni i shndërruar në politikan e përshkroi presidencën, si më të rrezikshme se disa nga profesionet më të rrezikshme.

“Si shembull, keni shoferët e makinave të garave, 1/10 e 1% vdesin. Kalorësit e demave, 1/10 e 1%. Kjo nuk është shumë, por është – njerëzit vdesin. Kur je president, është rreth 5%. Nëse dikush do të ma kishte thënë këtë, ndoshta nuk do të kisha vrapuar. Dakord? Ky është një profesion shumë i rrezikshëm.”

Katër nga 45 presidentët e SHBA-së janë vrarë. Disa presidentë dhe kandidatë të tjerë për këtë detyrë janë qëlluar me armë zjarri.

Ka pasur disa kërcënime ndaj jetës së Trump. Zyrtarët e zbatimit të ligjit thanë se Trump i mbijetoi gjithashtu një atentati më 15 shtator 2024, ndërsa po luante golf në fushën e tij në West Palm Beach, Florida. I dyshuari në atë incident përballet me pesë akuza federale dhe është deklaruar i pafajshëm.

I dyshuari për të shtënat në korrik u qëllua për vdekje nga agjentët e Shërbimit Sekret. Një person në tubimin në Pensilvani u vra; dy të tjerë u plagosën.

Shtetet e Bashkuara kanë thënë gjithashtu veçmas se Trupat elitare të Gardës Revolucionare Islamike të Iranit në një moment u përpoqën të vrisnin Trumpin. Irani, objektet bërthamore të të cilit u bombarduan nga forcat amerikane fundjavën e kaluar, e ka mohuar këtë akuzë.

Trump, i cili shërben mandatin e tij të dytë në detyrë, ka shtyrë përpara një vizion të gjerë të pushtetit presidencial, ka sulmuar ashpër kundërshtarët e tij politikë dhe është zotuar për hakmarrje kundër tyre.

Shtetet e Bashkuara po përjetojnë periudhën më të qëndrueshme të dhunës poltike që nga vitet 1970. Reuters ka dokumentuar më shumë se 300 raste të akteve të dhunshme të motivuara politikisht që kur mbështetësit e Trump sulmuan Kapitolin e SHBA-së më 6 janar 2021./ Reuters.