A mundet potenciali i mbretëreshave të ndalojë plakjen e njeriut? Në projekt janë investuar 800 milionë paund

Bletët mbretëresha, të cilat kanë ADN identike me bletët punëtore, por jetojnë shumë më gjatë, kanë tërhequr prej kohësh vëmendjen e shkencëtarëve që pyesin nëse mund të mbajnë sekretin e jetëgjatësisë dhe pjellorisë, shkruan The Guardian .

Qëllimi i projektit ambicioz shkencor është të hetojë biologjinë e bletëve për të përcaktuar se çfarë i ndihmon ato të mbijetojnë me vite dhe të jenë pjellore, ndërsa bletët punëtore jetojnë në rastin më të mirë vetëm disa muaj.

Agjencia Aria merret me projekte me vlera të larta, por të rrezikshme që mund të dështojnë, por nëse kanë sukses, mund ta ndryshojnë shoqërinë për mirë, shkruan gazeta britanike.

“Janë këto ide paksa të çmendura që kanë potencialin për të transformuar vërtet jetën e të gjithëve,” tha një nga 8 drejtorët e programit të agjencisë, Jannik Wurm.

Ky ish-profesor i gjenomikës evolucionare dhe bioinformatikës në Universitetin Queen Mary të Londrës do të udhëheqë një projekt për të studiuar bletët, grerëzat, milingonat dhe termitet që mund të japin rezultate të dobishme për shëndetin e njeriut.

“Nëse ne mund të zbulojmë dhe shfrytëzojmë mënyrat në të cilat natyra zgjidh sfidat me të cilat përballen mbretëreshat , kjo mund të sjellë një transformim në ndalimin e procesit të plakjes dhe përmirësimin e fertilitetit te njerëzit, si dhe zgjidhje të reja në luftën kundër sëmundjeve,” tha ai.

Hulumtimet e mëparshme kanë treguar se mbretëreshat e reja ruajnë spermën e shumë meshkujve në një organ të veçantë dhe më pas e lëshojnë atë gjatë gjithë jetës së tyre për të fekonduar vezët e tyre. Në zgjua, bletët punëtore ushqejnë mbretëreshën me një sekret të veçantë të pasur me vitamina, që besohet se kontribuon në jetën më të gjatë të bletëve, si dhe me antioksidantë dhe mikrobe specifike.

Siç na kujton The Guardian, vitin e kaluar shkencëtarët arritën t’u zgjasin jetëgjatësinë bletëve punëtore duke transplantuar mikrobe nga mbretëreshat.

Agjencia Aria u themelua në bazë të idesë së ish-kryekëshilltarit të ish-kryeministrit britanik Boris Johnson, Dominic Cummings dhe u frymëzua nga Agjencia Amerikane e Projekteve të Avancuara të Kërkimit të Mbrojtjes, DARPA, kujton gazeta.

Aria ka punuar më parë, ndër të tjera, në projekte që lidhen me sigurinë e inteligjencës artificiale, robotëve, bimëve sintetike, si dhe zonave të tjera pak të eksploruara. Çdo projekt Aria zgjat tre deri në pesë vjet, por shumë prej tyre kërkojnë më shumë kohë për të prodhuar rezultate.

– Ne shpesh themi për programet tona se ato dërgojnë një sinjal se gjithçka është e mundur. Kjo nuk do të thotë se ne do të kemi gjithmonë sukses dhe do të arrijmë vizionin e dëshiruar për të ardhmen në fund të një programi të caktuar – tha përfaqësuesja e agjencisë Aria, Pippi James.