Abonimi në Twitter Blue është rikthyer – çmim më i lartë për përdoruesit e iOS

Kompania ndaloi paraqitjen origjinale të abonimit në Twitter Blue pasi trollët abuzuan me veçorinë e verifikimit.

Pas përpjekjes së parë të dështuar për të futur verifikimin për një llogari me pagesë, Twitter ka nisur sot të prezantojë abonimin e rinovuar Blue.

Twitter fillimisht lançoi “Blue Verification” për pajisjet iOS në fillim të nëntorit për 8 dollarë në muaj, por kompania e ndaloi zbatimin e tij pasi platforma u përmbyt nga trollët e verifikuar. Të shtunën, kompania konfirmoi gjithashtu se shërbimi do të kushtojë 11 dollarë në muaj kur përdoruesit abonohen drejtpërdrejt përmes iOS.

Online, ku komisioni prej 30 për qind i Apple për blerjet brenda aplikacionit nuk zbatohet, abonimi do të kushtojë tetë dollarë në muaj, siç ishte paralajmëruar më parë.

Gjithashtu, kompania tregon se ka zbatuar masa të reja për të parandaluar përsëritjen e asaj që ndodhi muajin e kaluar. Si fillim, përdoruesit që duan të shfaqet distinktivi blu në profilin e tyre do të duhet të regjistrohen me një numër telefoni pasi të abonohen në shërbim.

we’re relaunching @TwitterBlue on Monday – subscribe on web for $8/month or on iOS for $11/month to get access to subscriber-only features, including the blue checkmark 🧵 pic.twitter.com/DvvsLoSO50

— Twitter (@Twitter) December 10, 2022

Twitter shton se abonentët mund të ndryshojnë emrin e tyre @, emrin e shfaqur dhe foton e profilit pas marrjes së statusit të verifikuar, por kompania do të heqë përkohësisht etiketën e tyre blu ndërsa rishikon profilin e tyre.

“Ne kemi shtuar një hap rishikimi përpara se të miratojmë një distinktiv blu në një profil si një nga hapat tanë të rinj për të luftuar imitimin (që është kundër rregullave të Twitter-it),” tha menaxherja e produkteve të Twitter, Esther Crawford.

Twitter thotë se abonentët Blue më vonë do të kenë akses në disa veçori të tjera, duke përfshirë aftësinë për të postuar video më të gjata dhe për të marrë më pak reklama. Ndërkohë, përfitime të tjera për Twitter Blue përfshijnë aftësinë për të redaktuar tweet dhe për të futur video 1080p.

Twitter do të fillojë të nxjerrë distinktivët e rinj të artë dhe gri të shpallur nga Elon Musk më 25 nëntor, duke filluar me arin për bizneset. Më vonë gjatë javës, kompania planifikon të fillojë të nxjerrë këto distinktivë gri në profilet e qeverisë dhe “shumëpalëshe”. Shenjat do të zëvendësojnë distinktivin “zyrtar” me të cilin kompania eksperimentoi shkurtimisht pas nisjes së verifikimit të profilit me pagesë.