Agjencia paralajmëron për këto ndryshime në raportin e fundit mbi pasojat e ndryshimeve klimatike në planet gjatë disa dekadave.
Zyra Met thotë se akullnajat në mbarë botën janë zvogëluar mesatarisht me rreth një metër në vit nga viti 2011 deri në vitin 2020. Më shumë se 40 “akullnaja referuese” u matën dhe rezultatet treguan reduktimin më të madh të masës së akullnajave në atë dekadë.
“Çdo dekadë që nga vitet 1990 ka qenë më e ngrohtë se e kaluara dhe ne nuk shohim asnjë shenjë të ndryshimit të këtij trendi”, tha Sekretari i Përgjithshëm i Agjencisë Botërore të Meteorologjisë, Peter Tallas, duke paralajmëruar se bota po humbiste garën për të shpëtuar akullnajat në shkrirje.
Tallas vuri në dukje se ngrohja e oqeaneve dhe shkrirja e akullnajave kanë çuar në një gati dyfishim të shkallës së rritjes së nivelit të detit në më pak se një brez.
Një klimatolog nga Universiteti i Pensilvanisë në Amerikë, Michael Mann, pohon se ngrohja është rritur në mënyrë të qëndrueshme që nga viti 1990, por që nuk po përshpejtohet.
Mann paralajmëroi se një ngrohje e tillë po nxit ngjarje gjithnjë e më të rrezikshme të motit ekstrem, përmbytje bregdetare dhe shumë ndikime të tjera “katastrofike”. Ai theksoi se është jashtëzakonisht e nevojshme që në samitin global COP28, që po mbahet në Dubai, të arrihen përfundime për reduktimin e emetimeve të dioksidit të karbonit.
