Ançeloti i bundur se Reali do të arrijë në Top 8 të Ligës së Kampionëve
Karlo Ançeloti u pa i nervozuar derisa Real Madridi u mposht nga Liverpulli me rezultat 0:2 në xhiron e pestë të fazës së ligës në Ligën e Kampionëve.
“Los Blankos” vazhduan me formë të zbehtë, ndërsa po përballen me lëndime të shumta e të shpeshta në këtë edicion, të cilat po ua pamundësojnë që t’i shfaqin vlerat e tyre.
Përkundër humbjes së tretë në këtë sezon në Ligën e Kampionëve, ish-trajneri i Juventusit, Milanit, Çellsit, Paris Sen Zhermenit, Bajern Munihut, Evertonit e Napolit, beson se madrilenët do të kualifikohen në të tetën e finales, si zakonisht. Kampionët spanjollë dhe evropianë duhet t’i fitojnë tri ndeshjet e mbetura për të shpresuar që të futen në Top 8.
“Do të kualifikohemi në raundin tjetër dhe do të garojmë si çdo vit. Do ta shihni”, deklaroi trajneri italian pas ndeshjes.
